PH dapat maghain ng Diplomatic Protest kasunod ng pagkakaaresto sa 21 Pinoy Marino sa US na nag- access umano ng child pornography materials online

Nais ni Senator Raffy Tulfo na maghain ng Diplomatic Protest ang pamahalaan kaugnay ng pagkakaaresto sa dalawampu’t isang (21) Pinoy Marino sa Estados Unidos dahil sa isyu ng pag-access umano nila sa child pornography materials online.

Ayon sa senador makikipag-ugnayan siya sa Department of Foreign Affairs para hilingin nito sa American counterparts na ilabas ang mga ebidensya laban sa mga Pinoy at kung walang maipapakitang sapat na ebidensya, dapat linisin ang kanilang record at bawiin ang 10-year ban na ipinataw sa kanila sa pagpasok sa U.S.

Ayon kay Tulfo, kumapit sa kaniya ang labingpito (17) sa dalawampu’t isang (21) Pinoy Marino na ipinosas at pwersahang pinababa sa kanilang cruise ship ng mga tauhan ng U.S. Customs and Border Protection at mariin nilang itinanggi ang paratang laban sa kanila.

Tinawagan na ng senador si DFA Undersecretary Eduardo de Vega upang imungkahi ang government-to-government approach para matugunan ang problema at matulungan ang mga Pinoy.

Kaugnay nito ay umapela din si Tulfo sa mga seafarer lalo na ang mga nasa U.S. na maging maingat sa mga link na kini-click na konektado sa kanilang e-mail o iba pang social media applications dahil napakahigpit ng polisiya ng nasabing bansa laban sa child pornography. (DDC)