Healthcare workers umapelang mapasama sila sa early voting tuwing eleksyon

Nais ng mga healthcare worker na mapasama sila sa mabibigyan ng pagkakataon na makaboto ng maaga tuwing magdaraos ng halalan sa bansa.

Ayon kay Dr. Wenceslao Llauderes, Medical Center Chief II ng Jose Reyes Memorial Medical Center, welcome sa kanila ang inisyatiba ng Commission on Elections na pagkakaroon ng Special Registration sa nasabing pagamutan dahil marami sa kanilang mga doktor at nurse ang hindi nakakapagparehistro dahil sa tawag ng tungkulin.

Sa mahigit dalawang libong (2,000) empleyado ng Jose Reyes, nasa kalahati aniya ang hindi rehistrado.

Pero ayon kay Llauderes, mas mainam din sana kung mapapasama ang mga healthcare worker sa early voting kapag halalan, dahil madalas din na hindi sila nakakaboto.

Sinabi ni Llauderes na kapag eleksyon kasi, naka-code white ang mga ospital sa bansa at kailangang naka-duty ang mga doktor at staff para handa sila sakaling may mga pasyenteng dadalhin sa mga pagamutan. (DDC)