Curfew sa mga menor de edad sa Marikina, hihigpitan

Iniutos ni Marikina City Mayor Maan Teodoro ang mahigpit na pagpapatupad ng umiiral na curfew sa lungsod para sa mga menor de edad.

Batay sa umiiral na ordinansa, mahigpit na ipinagbabawal ang pananatili sa pampublikong lugar ng mga edad 18-pababa mula 10:00 ng gabi hanggang 4:00 ng madaling araw.

Ayon sa Marikina City Public Information Office, layon ng patakarang ito na maprotektahan ang kabataan laban sa mga panganib gaya ng gang wars, paggamit ng ipinagbabawal na gamot, at pag-inom ng alak sa lansangan.

Papayagan lamang ang mga menor de edad sa nasabing mga oras kung may kasamang magulang o legal guardia, at may lehitimong dahilan at makakapagpakita ng kaukulang dokumento.

Ang paglabag sa curfew ay may karampatang multa o community service. (DDC)