Pinal na pasya sa pagbabawal na pumarada sa Public Streets ilalabas sa Sept. 1

Bubuo ng Technical Working Group para makapagpalabas ng pinal na polisiya sa pagbabawal sa mga sasakyan na pumarada sa lahat ng public streets sa Metro Manila.

Ito ang napagkasunduan ng Metro Manila Council, Metropolitan Manila Development Authority at Department of the Interior and Local Government matapos ang isinagawang pulong.

Sa suhestyon kasi ni DILG Secretary Jonvic Remulla, dapat ipagbawal ang pagparada sa lahat ng public streets sa Metro Manila mula 5:00 ng umaga hanggang 10:00 ng gabi.

Para naman kay MMDA Chairman Don Artes, iminungkahi nitong isabay sa pag-iral ng number coding scheme ang parking ban o mula 7:00 hanggang 10:00 ng umaga at 5:00 ng hapon hanggang 8:00 ng gabi.

Ayon kay Artes sa September 1 ilalabas ng bubuuing TWG ang pinal na polisiya at habang hinihintay ito, patuloy na ipatutupad ng MMDA ang pagbabawal na pumarada sa lahat ng pangunahing lansangan sa NCR kabilang ang Mabuhay Lanes. (DDC)