Riding-in-tandem suspects sumalakay, 1patay sa Las Piñas City

Patay ang isang 34-anyos na lalaki matapos pagbabarilin ng dalawang suspek na sakay ng motorsiklo habang nagpapakarga ng gasolina sa sasakyan ang biktima sa Shell Gasoline Station na matatagpuan sa No. 275 Alabang-Zapote Road, Barangay Pamplona Uno, Las Piñas City.

Binawian ng buhay nang idating sa Christ the King Medical Center Unihealth Las Piñas ang biktima na si Aerjero Elmer Cabarles y Regala, nakatira sa 003A B2 Apo Street, Bermuda Country Subd., Brgy. Pamplona Uno sa nasabing lungsod.

Inaalam ng otoridad ang pagkakakilanlan ng dalawang suspek na sakay ng isang Yamaha Mio motorcycle kung saan ang rider ay nakasuot ng brown jacket, itim na maong pants at asul na helmet habang itim na jacket ang suot naman ng backrider.

Sa inisyal na imbestigasyon nina SSg Jayson Gordo at SSg Julian Justine Tabuzo, batay sa salaysay ng service crew ng gasolinahan, nakasakay ang biktima sa minamaneho nitong gray Toyota Hilux (DBA 2529) at nagpakarga ng gasolina sa lugar nang biglang sumulpot ang riding-in- tandem suspects bago siya bistayin ng bala gamit ng hindi pa batid na kalibre ng baril.

Dahil dito, ang minamanehong sasakyan ng biktima ay bumangga sa sementadong pader ng gasolinahan habang nakaandar pa rin ang makina.

Mabilis na tumakas ang mga suspek sakay ng naturang motorsiklo patungong direksiyon ng Alabang.

Kaagad dinala ang biktima sa pagamutan subalit idineklarang dead-on-arrival ng alas-10:37 ng gabi ng kanyang attending physician na si Dr. Joyce Divinagracia.

Sa pagsisiyasat ng mga imbestigador sa pinangyarihan hawak pa umano ng biktima ang selyadong plastic transparent sachet na naglalaman ng umano’y shabu.

Kaagad namang nagkasa ng dragnet operation ang otoridad para sa posibleng pag-aresto ng mga suspek.

Patuloy ang masusing imbestigasyon ng otoridad sa nasabing pamamaril. (Bhelle Gamboa)