Guadalupe Bridge rehab pinatutuloy na ni Pang. Marcos; mga hanging bridge sa bansa pinasusuri sa DPWH at DILG

Target ng pamahalaan na masimulan na ang rehabilitasyon sa Guadalupe Bridge sa EDSA, Makati City.

Sa kaniyang State of the Nation Address sinabi ni Pangulong Ferdinand Marcos Jr. na kailangan nang maisagawa ang rehab sa nasabing tulay dahil lumang-luma na ito.

Pero ayon sa pangulo, gagawa muna ng detour bridge na pansamantalang madaraanan ng mga motorista habang isinasaayos ang Guadalupe Bridge.

Samantala, inatasan din ng pangulo ang Department of Public Works and Highways at Department of the Interior and Local Government na suriin din maging ang maliliit na tulay kabilang ang mga hanging bridge sa bansa para agad makumpuni kung kinakailangan.

Ikinabahala kasi ng pangulo ang pagtawid ng mga residente, kabilang ang mga guro at mag-aaral sa Midsalip, Zamboanga del Sur sa rumaragasang tubig ng Pisompongan River makaraang masira ang hanging bridge na araw-araw nilang ginagamit. (DDC)