Dumaraming overweight ikinabahala ni Pang. Marcos; Track and Field Oval ng PSC bubuksan sa publiko

Ikinabahala ni Pangulong Ferdinand Marcos Jr. ang pagdami ng mga edad 20 pataas na sobrang taas ng timbang.

Dahil dito, inanunsyo ng pangulo sa kaniyang State of the Nation Address na bilang pagsuporta sa pagkakaroon ng malusog na pangangatawan ng mamamayan libre nang magagamit ng publiko ang track and field facilities ng Philippine Sports Commission sa Pasig City, Maynila at Baguio City.

Ayon sa pangulo ang mga track and field oval ng PSC ay bubuksan sa publiko para sa mga nais na mag-jogging o mag-ehersisyo.

Nanawagan din si Pangulong Marcos sa iba pang local government units na magpatupad din ng “Car-Free Sundays” na ginagawa na sa ibang mga lungsod sa Metro Manila, Baguio, Cebu, Iloilo at Davao.

Umapela din ang pangulo sa mga LGU na gawing maaliwalas ng mga parke at plaza sa kani-kanilang mga lugar para magamit ng publiko. (DDC)