PAGASA naglabas ng babala ng Storm Surge sa walong lalawigan sa Luzon

Naglabas ng Storm Surge Warning ang PAGASA sa walong lalawigan sa Luzon bunsod ng malakas na hangin at pag-ulan dulot ng Bagyong Emong.

Sa Storm Surge Warning ng PAGASA, may katamtaman hanggang sa mataas na tsansa na storm surge sa low lying coastal areas ng Ilocos Sur, La Union, Pangasinan, at Zambales sa susunod na 24 na oras.

Maaring umabot sa 2.1 hanggang 3 meters ang storm surge o daluyong.

Samantala, 1 hanggang 2 meters naman ang inaasahang taas ng daluyong sa low lying areas sa Batanes, Cagayan, Ilocos Norte at Isabela.

Paalala ng PAGASA iwasan ang manatili sa baybaying dagat, kanselahin ang lahat ng marine activities at mag-antabay sa mga abiso ng weather bureau. (DDC)