Viral video ng pangungutya ng mga dating miyembro ng Viva Hotbabes sa mga PWD, kinondena ng NCDA

Kinondena ng National Council on Disability Affairs (NCDA) ang viral video ng mga dating miyembro ng grupong Viva Hotbabes na nagpapakita umano ng pangungutya sa mga persons with disabilities.

Ayon sa NCDA, paglabag sa Republic Act No. 9442 ang content ng isang video na ibinahagi sa Facebook page ni Sheree Vidal Bautista kasama sina Gwen Garci, Maui Anne Taylor, at isa pang social media influencer na si Zara Lopez.

Sa nasabing video na umani ng mahigit 900,000 views nagkunwari silang mga blind, deaf, at mute para sa isang comedic effect na sa ilalim ng batas ay maituturing na pangungutya sa mga PWD.

Ayon sa NCDA, ang paglabag sa nasabing batas ay may katapat na parusang 200,000 pesos na multa at pagkakabilanggo ng hanggang 6 na taon.

Dahil dito ay nanawagan ang NCDA sa mga personalidad na nasa likod ng naturang video na agad itong alisin sa kanilang platforms, mag-isyu ng public apology sa disability community at sumailalim sa disability sensitivity training para maunawaan nila ang inclusive at ethical media practices.

Nanawagan din ang NCDA sa iba pang content creators, influencers, at sa publiko na ang pagkakaroon ng kapansanan ay hindi dapat ginagawang katatawanan.

Tiniyak ng council na patuloy nitong babantayan ang digital platforms para sa anumang discriminatory content laban sa mga PWD. (DDC)