Doxycycline hindi pwedeng basta-basta inumin nang walang reseta ayon sa DOH

Nagpaalala ang Department of Health sa publiko sa pag-inom ng doxycycline para makaiwas sa sakit na leptospirosis na nakukuha sa ihi ng daga.

Ngayong marami pa ring lugar ang nakararanas ng pagbaha, sinabi ng DOH na hindi pwedeng basta-basta inumin ang nasabing gamot nang walang reseta mula sa doktor.

Kapag kasi mali ang pag-inom nito, pwedeng mawalan ito ng bisa laban sa mga mikrobyo at maging mas mahirap gamutin ang simpleng impeksyon.

Ayon sa kagarawan, nakadepende ang pag-inom ng doxycycline sa exposure o risk level ng taong nalubog sa baha.

Payo ng DOH, kung lumusong sa baha may sugat man o wala, dapat magpakonsulta muna sa doktor tungkol sa pagpapareseta at pag-inom ng gamot at kung mayroon namang sugat, ipinayo ng DOH na hangga’t maaari ay iwasan nang lumusong sa tubig-baha. (DDC)