Las Piñas City nagdeklara ng State of Calamity dahil sa malawakang baha dulot ng Habagat

Opisyal na idineklara ng Sangguniang Panlungsod ng Las Piñas na State of Calamity ang siyudad kasunod ng malawakan at matinding baha na sanhi ng patuloy na malalakas na ulan na epektong dulot ng Habagat.

Ito ay pinagtibay sa pamamagitan ng City Resolution No. 4449-25, kung saan binanggit na 18 barangays ang apektado ng baha na umabot hanggang tatlong talampakan sa ilang mababang lugar sa lungsod.

Ayon sa City Social Welfare and Development Office (CSWDO), halos 2,000 na pamilya o katumbas ng 6,000 na indibiduwal ang inilikas at pansamantalang nanunuluyan sa mga evacuation centers ng Las Piñas.

Ang deklarasyon ay batay sa rekomendasyon ng Las Piñas City Disaster Risk Reduction and Management Council (CDRRMC) at ng Resolution No. 2025-06 ng Las Piñas Disaster Risk Reduction and Management Council (LPDRRMC), na nasasad ang agarang aksyon dahil sa patuloy na mga panganib o peligrong hatid ng baha.

Agad pinakilos ni Mayor April Aguilar ang lahat ng concerned departments kabilang ang DRRMO, City Engineering Office, CSWDO, and City Health Office na ituloy-tuloy ang paghahatid ng tulong at magsagawa ng assessments sa mga komunidad na matinding nasalanta ng baha.

Nagpapatuloy din ang relief distribution efforts sa koordinasyon ng Department of Social Welfare and Development (DSWD). (Bhelle Gamboa)