Manuyo Uno Evacuees sa Las Piñas City binisita ni Mayor Aguilar

Binisita ni Mayor April Aguilar ang mga inilikas na residente mula sa Lombos Compound, Barangay Manuyo Uno kasunod ng matinding baha kahapon.

Personal na inalam ni Mayor Aguilar ang kalagayan ng mga evacuees at ang mga pangunahing pangangailangan ng mga ito na agad ibinigay ng Pamahalaang Lungsod ng Las Piñas.

Ayon sa ulat, umabot na sa kabuuang 23 na pamilya o katumbas ng 64 na indibiduwal ang kasalukuyang nanunuluyan sa Manuyo Uno Elementary School.

Unang dinala ang evacuees sa Manuyo Uno Covered Court kung saan nagtayo ang City Disaster Risk Reduction Management Office ng mga modular tent habang patuloy na minomonitor ang kanilang sitwasyon.

Sa naturang pagbisita ng alkalde, kaagad din siyang nakipag-ugnayan sa city personnel upang matukoy ang agarang kailangan.

Tiniyak din nito ang kaukulang mga hakbang at pag-iingat upang tugunan ang kapakanan ng mga apektadong residente habang tinutugunan ng lokal na pamahalaan ang mga emergencies na may kinalaman sa kalamidad.

Base sa City Social Welfare and Development Office (CSWDO), ipamamahagi ngayong Martes ang mga food packs mula sa Department of Social Welfare and Development (DSWD) na bahagi ng tuluy-tuloy na relief operations.

Samantala may naitala ngayong Martes sa Brgy. Talon Tres na 31 pamilya o 114 na indibiduwal na inilikas at nanunuluyan sa evacuation center sa Carmencita Covered Court. (Bhelle Gamboa)