Batangas Gov. Vilma Santos-Recto, 12 alkalde nag-boodle fight; mga isdang huli sa Taal Lake, inulam

Para patunayan na ligtas kainin ang mga nahuhuling isda sa Taal Lake kabilang ang Tawilis, nagsagawa ng boodle fight ang mga lokal na opisyal sa Batangas at inulam ang mga isdang nahuli sa lawa.

Maliban sa Tawilis tampok din sa isinagawang bodle fight ang mga pangunahing isda mula sa Taal Lake gaya ng Tilapia at Bangus para ipakita sa publiko na walang dapat ikabahala sa pagbili at pagkain ng nasabing mga isda.

Pinangunahan ni Batangas Governor Vilma Santos-Recto, at ng labindalawang (12) alkalde sa paligid ng lawa ang isinagawang boodle fight.

Ayon kay Bureau of Fisheries and Aquatic Resources Region IV-A Director Sammy Malvas, walang siyentipikong ebidensiyang magpapatunay na kontaminado ang lawa.

Maliban dito, ang isdang “Tawilis” aniya ay isang “planktivore” at hindi ito kumakain ng nabubulok na laman, habang ang Tilapia at Bangus ay pinalalaki naman sa mga palaisdaang may kontroladong pasilidad at pinapakain ng commercial feeds.

Dahil sa pahayag na sa Taal Lake itinapon ang labi ng mga nawawalang sabungero, bumaba ang demand at presyo sa mga produktong isda galing sa lawa at labis na naapektuhan ang kabuhayan ng mga mangingisda. (DDC)