DOE may paalala sa mga binahang residente para maiwasan ang pagka-kuryente

Dahil maraming lugar ang lubog sa baha nagpaalala ang Department of Energy o DOE sa mga residente para maiwasan ang mga sakuna gaya ng pagka-kuryente.

Ayon sa DOE, kung binaha ang loob ng bahay o gusali dapat agad patayin ang main circuit breaker para maiwasan ang insidente na mayroong makuku-kuryente.

Hindi din dapat gamitin o hawakan ang mga nabasang gamit na de-kuryente o nalubog sa baha. Kailangan munang ipasuri sa electrician para masigurong ligtas itong gamitin.

Kung mayroong putol, lumubog o bumagsak na kable ng kuryente, dapat itong agad i-report sa kinauukulan at huwag basta-basta lapitan o hawakan. (DDC)