Empleyadong hindi makakapasok sa trabaho dahil sa matinding sama ng panahon, hindi dapat parusahan – DOLE

Nagpaalala ang Bureau of Working Conditions ng Department of Labor and Employment sa mga employer na maaari silang magsuspinde ng trabaho kapag may sama ng panahon para matiyak ang kaligtasan at kalusugan ng kanilang mga empleyado.

Ayon sa DOLE, sa ilalim ng Labor Advisory No. 17 ang mga employer sa pribadong sektor ay maaaring gamitin ang “management prerogative” para magpatupad ng work suspension.

Sa ilalim din ng nasabing abiso ng DOLE, walang matatangggap na bayad para sa nasabing araw ang empleyadong hindi papasok sa trabaho maliban na lamang kung mayroong umiiral na paborableng company policy.

Hindi din dapat patawan ng parusa o administrative sanction ang isang empleyado na mabibigong makapasok sa trabaho kung maaaring malagay sa alanganin ang kaniyang kaligtasan dahil sa nararanasang sama ng panahon. (DDC)