Bulagaan sa drug testing sa mahigit 450 na empleyado ng munisipyo sa bayan ng Infanta, Quezon
Sa mismong morning devotion o flag ceremony, pinirmahan ni Mayor L.A. Ruanto ang Executive Order No.10 na nagdedeklara ng Drug-free Workplace sa Lokal na Pamahalaan ng Infanta kung kaya’t agad na nagsagawa ng drug testing sa mga opisyal at kawani nito nitong araw ng lunes, Hulyo 21, 2025.
Nagitla ang mga empleyado dahil matapos pinirmahan ang naturang kautusan ay kaagad ikinasa kaya’t walang nakalabas sa covered court plaza at walang nakatakas.
Binigyang-diin ni Ruanto ang kampanya kontra ilegal na droga at minarapat na simulan ito sa mismong pamahalaan upang mas magiging epektibo ito sa bawat pamayanan na walang palakasan kahit opisyal ka man.
Ayon kay Mayor Ruanto, ipapatupad niya ang One Strike Policy, ibig sabihin kapag ikaw ay isang Job Order ay maari kang matanggal sa trabaho kapag ka nagpositibo na gumagamit sa ilegal na droga.
Base sa panuntunan ng Civil Service Commission na kapag ikaw ay permanent na empleyado na nagpositibo sa paggamit ng ilegal na droga at maari kang irerekomenda na dadaan ka sa rehabilitation depende kung ilang buwan ka mananatili sa pasilidad depende sa estado ng iyong kalagayan.
Katuwang ang Philippine Drug Enforcement Agency (PDEA) sa pagsusuri upang matiyak na hindi sila gumagamit ng iligal na droga. Ang inisyatiba ay sumusunod sa Seksyon 36 ng Republic Act 9165, na nag-uutos ng random na pagsusuri sa droga upang itaguyod ang isang ligtas at walang droga na lugar ng trabaho.
Kauna-unahan rin ito sa kasaysayan ng kanilang bayan ang pagdeklara ng Drug-free Workplace matapos ang election upang tuluyan ng matuldukan ang mga sangkot sa anumang ilegal na droga.
Ayon kay Police Major Fernando Credo na siyang Hepe ng Infanta Municipal Police Station ay malaking tulong ang pagdeklara ng alkalde sa paglaban sa ilegal na droga dahil mas nabigyan ng pangil ang batas upang masawata ang mga iligal na gawain ng nasabing bayan.
Isa aniyang malaking hamon sa hanay ng mga awtoridad ay ang madaming exit point ang nasabing bayan kagaya na lamang sa kahabaan ng coastal area na maaring maging lagusan ng mga drug pushers.
Tiniyak naman ni Credo na mas hihigpitan pa lalo ang kanilang pagbabantay sa mga lugar na identify na pugad ng mga pagtutulak ng iligal na droga na mas triple pa ang kanilang trabaho upang matuldukan ang krimen sa Bayan ng Infanta.
