Publiko pinag-iingat ng DOH sa posibleng kontaminasyon sa inuming tubig

Pinag-iingat ng Department of Health ang publiko sa kanilang inuming tubig lalo ngayong maraming lugar ang binabaha.

Ayon sa DOH, sa ganitong panahon na nararanasan ang matinding pag-ulan, posibleng ma-kontamina ang inuming tubig mula sa mga nasirang water at sewage pipes na nalubog sa baha.

Paalala ng DOH, tiyaking ligtas ang iniinom na tubig sa bahay man o sa evacuation center upang makaiwas sa sakit tulad ng cholera, diarrhea, at leptospirosis.

Naghanda na ang DOH ng chlorine tablets bilang isa sa mga emergency commodities para may malinis na inuming tubig ang mga inilikas.

Maliban sa paggamit ng chlorine tablets, maaari ring pakuluan ang tubig sa loob ng 2 minuto bago inumin. (DDC)