Maraming lugar sa bansa makararanas pa din ng pag-ulan – PAGASA

Kahit nakalabas na ng bansa ang Severe Tropical Storm Crising makararanas pa din ng pag-ulan sa maraming lalawigan sa bansa dulot ng Habagat.

Ayon sa weather forecast ng PAGASA, kabilang sa makararanas ng heavy to intense na pag-ulan sa Zambales, Bataan, at Occidental Mindoro.

Katamtaman hanggang sa malakas na pag-ulan ang mararanasan sa Metro Manila, Ilocos Region, Benguet, Tarlac, Pampanga, Bulacan, Cavite, Laguna, Batangas, Rizal, Oriental Mindoro, Antique, at Iloilo.

Sa nalalabing bahagi ng Luzon, nalalabing bahagi ng Visayas, Zamboanga Peninsula, Northern Midnanao at Caraga makararanas din ng kalat-kalat na katamtaman hanggang sa malakas na pag-ulan.

Babala ng PAGASA ang malakas at patuloy na buhos ng ulan na mararanasan ay maaari pa ding magdulot ng flashflood o landslide. (DDC)