Bagong 2-storey Health Center sa Brgy. Talon Singko pinasinayaan ng Las Piñas LGU

Pormal nang pinasinayaan ng Pamahalaang Lungsod ng Las Piñas ang bagong itinayong dalawang palapag na pasilidad ng Moonwalk Health Center na matatagpuan sa Apollo III Street in Moonwalk Village, Barangay Talon Singko.

Ang inagurasyon ng pasilidad ay pinangunahan ni Mayor April Aguilar kasama si Vice Mayor Imelda Aguilar.

Ang bagong health center ay parte ng tuluy-tuloy na mga hakbang ng lokal na pamahalaan upang pagbutihin ang access ng mahahalagang serbisyong pangkalusugan partikular sa mayroong malaking populasyon na mga barangay.

Ang lumang health center ng Talon Singko na katabi lamang ng barangay hall ay mayroong limitadong espasyo at kakaunti lamang ang kayang matanggap nitong mga pasyente.

Noong 2023 sinimulan ng konstruksiyon ng bagong pasilidad na pinagtulungang pinondohan ng Department of Health’s Health Facility Enhancement Program, Department of Public Works and Highways, at ng Las Piñas City Government.

Nabatid na ang Moonwalk Health Center ay may floor area na 316.25 na metro kuwadrado at mayroon itong upgraded medical at dental facilities. Sa unang palapag ay matatagpuan ang consultation at doctor’s rooms, breastfeeding room, PWD comfort room, TB-DOTS area, at medicine stock room. Habang sa ikalawang palapag naman ay naroon dito ang dental clinic, family planning at counseling rooms, conference room, restrooms, pantry, at karagdagang storage o imbakan.

Binigyang-diin ni Mayor April Aguilar na ang proyektong ito ay sumasalamin sa patuloy na pangako ng lungsod na magtayo ng mas matatag at lalong accessible na pampublikong pangkalusugang imprastraktura.

Sa ilalim ng administrasyon ng alkalde, ginawang moderno ang mga health centers upang tiyakin na matatanggap ng bawat residente ang napapanahon at komprehensibong alagang medikal lalo na sa mga barangay kung saan marami ang mga nangangailangan. (Bhelle Gamboa)