Pang. Marcos nag-inspeksyon sa National Resource Operations Center ng DSWD sa Pasay
Personal na ininspeksiyon ni Pangulong Ferdinand “Bongbong” Marcows Jr. kasama si Department of Social Welfare and Development Secretary Rex Gatchalian ang National Resource Operations Center (NROC) ng ahensiya sa Pasay City ngayong umaga ng Biyernes, Hulyo18.
Layunin ng inspeksiyon na alamin ang paghahanda ng ahensiya na sapat ang relief packs na kasama sa tulong na ipamamahagi sa mga apektadong residente sa pananalasa ng Bagyong Crising at Habagat partikular sa hilagang bahagi ng Luzon at sa iba pang lugar na binaha sa ating bansa.
DSWD, tiniyak ang sapat na supply ng food packs relief goods para sa mga maapektuhan ng Bagyong Crising at iba pang sakuna gaya ng baha at sunog.
Kinumpirma ni Sec. Gatchalian na mayroong 3-milyong family food packs na nakaposisyon sa iba’t ibang lugar sa bansa na handang ipamahagi kung kinakailangan lalo na sa panahon ng emergency.
Nilinaw pa ng kalihim na tuluy-tuloy ang operasyon ng DSWD sa araw-araw may bagyo man o wala upang agad na mapalitan ang mga food packs na ipinamamahagi sa mga apektadong residente.
Sa pinakabagong datos ng ahensiya, nasa mahigit 5,000 na pamilya o katumbas ng 17,000 na indibiduwal ang naapektuhan ng Bagyong Crising at Habagat.
Ang mga apektadong pamilya ay kasalukuyang nanunuluyan sa evacuation centers. (Bhelle Gamboa)
