District Hospitals sa Cagayan isinailalim sa Blue Alert

Itinaas sa Blue Alert Status ang lahat ng district hospitals sa ilalim ng Pamahalaang Panlalawigan ng Cagayan bilang paghahanda sa posibleng epekto ng bagyong “Crising.”

Sa ilalim ng alert level, inatasan ang lahat ng duty personnel na maghanda sa pagtugon anumang oras habang naka-standby naman ang mga off-duty personnel sakaling kailanganin sila.

Sa inilabas na memorandum order ni Provincial Health Officer Dr. Rebecca Battung, inatasan ang lahat ng Chief of Hospitals ng labindalawang (12) district hospitals sa lalawigan at ang mga miyembro ng Health Emergency Response Teams (HERT) na agad ipatupad ang nakasaad na Emergency Preparedness and Response (EPR) guidelines.

Kabilang sa mga direktiba ang pagtiyak ng sapat na bilang ng health personnel, suplay ng gamot at mga medical equipment, at ang kahandaan ng mga generator sakaling mawalan ng kuryente.

Samantala, patuloy ang panawagan ng PHO sa publiko na manatiling mapagmatyag, sumunod sa mga abiso ng otoridad, at agad magtungo sa pinakamalapit na health facility kung nangangailangan ng tulong medikal. (DDC)