DepEd hiniling na maisama sa budget ang konstruksyon ng mga “road-to-school”

Makikipagtulungan ang Department of Education (DepEd) sa Department of Public Works and Highways (DPWH) at local government units (LGUs) para makapagpatayo ng mas maraming access roads papunta sa mga pampublikong paaralan, lalo na sa mga liblib na lugar.

Iminungkahi ng DepEd na maisama sa mga plano at budget ng ahensya ang paggawa ng mga kalsadang papunta sa mga paaralang walang maayos na daan, lalo na sa mga bagong tayong eskwelahan.

Ayon kay Education Secretary Sonny Angara sa Buenavista, Agusan del Norte may mga estudyanteng kailangang tumawid ng ilog at umakyat ng bundok para lang makapasok sa paaralan.

Ani Angara, kung mayroong farm-to-market road, dapat ay mayroon ding road-to-school.

Bilang suporta sa panukalang ito, isinusulong ng DepEd ang isang special provision sa Fiscal Year 2026 Basic Education Facilities Fund (BEFF) na nagsasaad na dapat lahat ng bagong tayong paaralan ay may katumbas na access road. (DDC)