8 katao na gagawing scammer sa Cambodia naharang; recruiter arestado

Nasagip sa ikinasang joint operation ng Department of Migrant Workers, NAIA Task Force Against Trafficking at NBI ang walong Pinoy na biktima ng human trafficking.

Sa imbestigasyon ng mga otoridad, ang walo ay dadalhin sana sa Cambodia at pagtatrabahuhin bilang ‘scammers’.

Naaresto ang illegal recruiter na si Nicandro Cuneta na dating empleyado ng Philippine Offshore Gaming Operator o POGO at inatasan ng dati niyang Chinese employer na mag-recruit ng mga Pinoy para dalhin sa Cambodia.

Mahaharap si Cuneta sa kasong Illegal Recruitment at Human Trafficking.

Patuloy naman ang imbestigasyon ng mga otoridad upang tukuyin pa ang iba pang posibleng sangkot sa operasyon. (DDC)