P3.84M na halaga ng sigarilyo nakumpiska sa pantalan sa Surigao

Nakumpiska ng mga opisyal mula sa Philippine Ports Authority, Philippine Coast Guard at PNP ang halos 200 kahon ng sigarilyo sa pantalan sa Surigao del Norte.

Ayon sa PPA, nagsagawa ng inspeksyon sa mga kahon na lulan ng isang truck na papasok sana Lipata Port sa Surigao at nang tanungin ang driver, idineklara niyang contruction materials ang kaniyang sakay.

Nang buksan ang mga karga ng truck ay nakita ang 192 na kahon ng sigarilyo na walang kaukulang dokumento at tinatayang may kabuuang halaga na P3.84 milyon.

Agad na inabisuhan ang Bureau of Customs para sa imbestigasyon, imbentaryo, at dokumentasyon ng mga nakumpiskang kontrabando.

Ang mga nahuling sakay ng truck ay hawak na ng PNP Maritime at sasampahan ng kaukulang kaso. (DDC)