Lalaking pasahero arestado matapos mahulihan ng P139M na halaga ng shabu sa NAIA
Isang 25-anyos na lalaking pasaherong dumating ang nakumpiskahan ng 20.5 kilos ng umano’y methamphetamine hydrochloride o shabu na nagkakahalaga ng ₱139,767,200 sa isinagawang alert interdiction operation ng otoridad sa Customs International Arrival Area ng Ninoy Aquino International Airport (NAIA) Terminal 3 sa Pasay City.
Inaresto ang suspek na kinilalang si alyas “Chris”, isang Pilipino, dahil sa paglabag sa kasong Comprehensive Dangerous Drugs Act of 2002.
Dakong alas- 12:06 ng tanghali ng Lunes, Hulyo 14 nagkasa ng operasyon ang composite team sa ilalim ng Ninoy Aquino International Airport Inter-Agency Drug Interdiction Task Group (NAIA-IADITG) matapos matanggap ang intelligence information kaugnay sa pagdating ng pasahero.
Pinangunahan ang operasyon ng Philippine Drug Enforcement Agency (PDEA) Regional Office–NCR katuwang ang Bureau of Customs, Philippine National Police Aviation Security Group, Airport Police Department, PNP Drug Enforcement Group, National Bureau of Investigation, at ng Bureau of Immigration.
Ininspeksiyon ng otoridad ang asul na suitcase o maleta na dumating buhat sa flight ng Toronto, Canada na mayroong layover sa Hong Kong. Sa loob nito, nadiskubre ang limang plastic bags na nakabalot ng foil at duct tape kung saan ang bawat isa may nakasilid na white crystalline substances na tinatayang may kabuuang 20,554 na gramo na nakahalo sa personal na kagamitan.
Sa inisyal na field testing nakumpirma ang substance na methamphetamine hydrochloride at ang samples ay tinurn over sa PDEA Laboratory Service para suriin.
Narekober din ng mga imbestigador ang iba pang items kabilang ang Philippine passport, dalawang airline boarding passes, mobile phone, at national ID card.
Ang matagumpay na interdiction ay nagbigay-diin sa paninindigan ng PDEA at partner na mga ahensiya upang protektahan ang mga pantalan at hangganan ng bansa laban sa pagpupuslit ng ilegal na droga.
Nabatid na ang operasyon ay sumasalamin sa mas malawak na istratehiya ng gobyerno na paigtingin ang interdiction efforts at sugpuin ang ilegal na droga sa pagpasok sa ating mga komunidad. (Bhelle Gamboa)
