BuCor naglagay ng 2 full body scanners sa kulungan sa Occidental Mindoro kontra contraband smuggling

Inanunsyo ni Bureau of Corrections (BuCor) Director General Gregorio Pio P. Catapang Jr. ang operasyon ng dalawang full body scanners sa Sablayan Prison and Penal Farm (SPPF) sa Occidental Mindoro na layuning palakasin ang mga hakbang laban sa pagpupuslit ng kontrabando sa mga pasilidad partikular ang tinutuluyan ng high-profile persons deprived of liberty (PDL) kabilang ang mga notoryus o kilabot na drug lords.

Ayon kay Catapang umabot na sa apat na full body scanner ng BuCor kung saan ang dalawa nito ay inilagay sa New Bilibid Prison (NBP) sa Muntinlupa City noon pang Nobyembre 2024.

Aniya ang instalasyon ng full body scanners ay nakahanay sa maigting na mga hakbang ng gobyerno upang labanan ang ilegal na droga at palakasin ang seguridad sa prison system para matukoy ang mga items na nasa loob ng katawan, mga nakatago sa damit, at pribadong bahagi ng katawan ng mga bisita.

“We already acquired these scanners last month but installation were done a week ago and it is now fully operational to deter smuggling of contraband into SPPF, enhance security, streamline the visitor screening process without the need for cavity check,” paliwanag ni Catapang.

Idinagdag pa nito na bukod sa full body scanners, maglalagay din ang BuCor ng under vehicle surveillance camera sa SPPF sa susunod na buwan bilang karagdagang hakbang pangseguridad dahil mattutukoy nito ang ilalim ng mga sasakyan at maiwasan ang pagpasok ng kontrabando, pampasabog, at mga armas na maaring maitago mula sa standard visual inspection.

Isa dagdag na technological upgrades, nagdeploy ang Bucor ng 75 na tauhan sa ilalim ng Task Force “Sanib Pwersa,” na binubuo ng mga miyembro ng BuCor, Philippine National Police (PNP), Philippine Drug Enforcement Agency (PDEA) National Bureau of Investigation (NBI), at ng National Intelligence Coordinating Agency (NICA) upang magbigay ng komprehensibong seguridad kung saan inaasahan ìto na madagdagan ng 75 PNP personnel upang palakihin pa ang kanilang sa kabuuang 150.

Sinabi ni Catapang na ang mga makabagong kagamutan ay pagpapakita ng mas malawak na inisyatibo kung saan planong bumili ng anim pang scanners na ipamamahagi sa iba’t ibang prison and penal farm sa bansa. Ang ganitong pagpapalawak ay nagbigay-diin sa BuCor ng kanyang paninindigan na magtatag ng seguridad ng kapaligiran para sa lahat ng inmates at staff habang aktibong nagtatrabaho upang pigilan ang pagpasok ng ilegal na gamit sa correctional facilities. (Bhelle Gamboa)