Isa nawawala sa landslide sa Southern Leyte

Isa ang nawawala matapos ang naganap na landslide sa bayan ng San Ricardo, Southern Leyte umaga ng Linggo, July 13.

Nangyari ang insidente kasunod ng naranasang malakas na pag-ulan na nagsimula hapon ng Sabado hanggang madaling araw ng Linggo.

Ayon sa Eastern Visayas Police Regional Office naitala ang landslide sa Barangay San Ramon kung saan may ginagawang viaduct na magkukunekta dito sa katabing barangay na Looc.

Kinilala ng pulisya ang nawawalang indibidwal na si Dador Moscosa, 54-anyos na foreman ng 888 ACY Construction – ang kumpanyang namamahala sa nabanggit na infrastructure project.

Patuloy pa ang search and rescue operations sa pangunguna ng Municipal Disaster Risk Reduction and Management Office, pulisya at mga opisyal ng barangay para mahanap si Moscosa. (DDC)