Kasunod ng pag-veto ni Pang. Marcos sa NUP Bill, ilang PUP campuses nanganganib nang magsara

Ang pag-veto ni Pangulong Ferdinand marcos Jr. sa panukalang kilalanin ang Polytechnic University of the Philippines bilang National Polytechnic University ay banta sa kinabukasan ng unibersidad, mga campus nito at sa mga mag-aaral.

Ayon sa pahayag na inilabas ng PUP, ilang PUP campuses na ang napipintong mahinto ang operasyon dahil sa kawalan ng suporta o pondo mula sa gobyerno.

Sinabi ng PUP na ang NPU Bill ay hindi lamang naman pagkilala o titulo, sa halip ay ito sana ang komprensibong solusyon sa mga hamon na kinakaharap ng state university para patuloy na makapagbigay ng de kalidad na edukasyon.

Dagdag pa sa pahayag, kung inaprubahan ni Pangulong Marcos ang NUP Bill, matutugunan sana ang pangangailangan ng unibersidad sa imprastraktura at modernisasyon, pagpapalawig ng access sa edukasyon, regularisasyon ng mga staff at faculty na matagal nang panahon sa PUP, at maraming iba pa.

Sa kabila ng pag-veto sa panukalang batas, tiniyak ng PUP na hindi ito patitinag at patuloy na magbibigay ng inclusive learning para sa lahat. (DDC)