Mga inilikas sa evacuation center sa Las Piñas pinagkalooban ng tulong ng LGU
Pinangunahan ni Mayor April Aguilar ang personal na paghahatid ng kaukulang tulong sa mga Las Piñerong naapektuhan ng matinding baha, na nanunuluyan sa ilang evacuation centers sa Las Piñas City.
Unang ininspeksiyon ng alkalde ang evacuation center sa Verdant Covered Court sa Barangay Pamplona Tres upang matiyak na maayos ang kalagayan at natutugunan ang mga pangangailangan ng mga residenteng naapektuhan ng pagbaha.
Personal na nagpaabot ng mga tulong si Mayor Aguilar at tiniyak sa mga evacuees na nakahanda at bukas ang Verdant sa mga Las Piñerong naapektuhan.
Sa inisyal na datos ng City Social Welfare and Development Office umabot sa 101 na pamilya o 414 na indibiduwal ang inilikas sa Verdant Covered Court habang 82 pamilya sa Carmencita Covered Court at REPSI ng Brgy. Talon Tres, 14 pamilya sa Brgy. Hall, St. Joseph Covered Court Sa Brgy. Pulanglupa Dos, at 54 pamilya sa Aguilar Sports Complex at Sampaguita Chapel sa Brgy. Pilar.
Matapos ang magdamag na pagmonitor at pagtiyak ng agarang tugon sa mga biktima ng baha sa Las Piñas, agad na pinuntahan ng alkalde ang mga nabanggit na evacuation centers para pangunahan ang relief operations kasama ang mga kinatawan ng CSWDO, DRRMO, CHO at iba pang tanggapan ng lokal na pamahalaan. (Bhelle Gamboa)
