Tangkang pagpuslit ng kontrabando sa piitan sa Occidental Mindoro napigilan, dalawang opisyal sinibak ni Catapang
Agad sinibak ni Bureau of Corrections (BuCor) Director General Gregorio Pio P. Catapang Jr. ang isang camp commander at isang commissioned officer sa kanilang tungkulin sa Sablayan Prison and Penal Farm (SPPF) sa Occidental Mindoro kasunod ng tangkang pagpuslit ng mga kontrabando sa naturang corrections facility.
Ang mga sinibak ay kinilalang sina C/CInsp Francisco Madrid, camp commander; at CT/Insp Edgar Laudencia na kapwa nasa kustodiya ng Directorate for Personnel and Human Resource Development sa National Headquarters sa Muntinlupa City upang isailalim sa imbestigasyon.
Ayon sa report na isinumite ni SPPF Acting Superintendent CCINSP Abel Ciruela kay Catapang, ang tangkang pagpuslit o smuggling ay nagsimula sa kahina-hinalang pagparada ng dump truck (NAO 3283) na may kargang buhangin sa labas ng perimeter ng SPPF Hospital.
Nang kuwestiyunin ang driver ng trak na si Rob Antaran, sinabi nitong mayroong permit na pirmado ni Madrid na nagpapahintulot sa kanya na magdeliver ng materyales sa loob ng pasilidad kaya inutusan siya ng security team sa itinakdang unloading area.
Pagdating sa erya, tumanggi ang driver na idiskarga ang buhangin at sinabing hindi gumagana ang hydraulic system.
Dahil sa mariing pagtanggi nito, dinala ang driver sa visiting area malapit lamang sa pinaradahan ng trak upang siya ay tanungin kung saan inamin umano nito ang kargang buhangin ay may nakatagong kontrabando.
Mabilis na inalis ang bungain sa trak ng security and operations personnel at narekober ang kontrabando na kinabibilangan ng 213 na bote ng 1L Ginebra San Miguel, 48 na bote ng 700ml Ginebra San Miguel, 16 na bote ng 1L Jack Daniel’s Whiskey, dalawang bote ng 700ml Jack Daniel’s Whiskey, 30 reams ng Marlboro cigarettes na may tig-10 packs kada ream, 69 reams ng tobacco na tig-10 packs per ream, 10 packs ng tobacco na may tig-6 bricks kada pakete, at 37 sticks ng sigarilyo.
Iniutos ni Catapang ang masusing imbestigasyon sa insidente upang alamin kung may iba pang Bucor personnel na sangkot sa tangkang pagpasok ng kontrabando sa pasilidad.
Bunsod ng naganap na insidente sa SPPF, inatasan ni Catapang ang lahat ng superintendents ng OPPF upang magsagawa ng komprehensibong pag-aaral sa protocols na may kinalaman sa pamamahala at inspeksiyon ng deliveries at magpatupad ng mas istriktong guidelines o alituntunin sa pagsusuri sa mga sasakyan o vehicle checks, monitoring entry permits, at pagsasagawa ng hindi inanunsyong inspeksiyon upang maibsan ang banta sa ng tangkang pagpupuslit sa hinaharap. (Bhelle Gamboa)
