Taguig barangay kagawad na kaalyado ng natalong kongresista, sasampahan ng kasong Acts of Lasciviousness

Kakasuhan ng Acts of Lasciviousness si Barangay Kagawad Apolonio Kibral Fulo Jr. ng Barangay Pinagsama, Taguig City na kilalang kaalyado at bodyguard ng natalong District 2 congressional candidate na si Pammy Zamora, matapos makita ng Office of the Cebu City Prosecutor ang sapat na ebidensya upang dalhin ang reklamo sa korte.

Ang reklamo ay inihain ng kapwa opisyal ng barangay kaugnay ng isang insidenteng nangyari sa isang official training sa Cebu City noong Abril 2024. Matapos ang masusing pag-aaral ng mga pahayag, sinumpaang salaysay, at dokumento, inirekomenda ng mga prosecutor ang pormal na pagsasampa ng kaso.

Sa Joint Resolution na lumabas nitong Mayo 27, 2025, inirekomenda ang pagsasampa ng kaso sa Metropolitan Trial Court.

Kasalukuyang suspendido si Fulo ng anim na buwan matapos mapatunayang administratively liable sa kasong grave misconduct, immoral acts, at conduct prejudicial to the best interest of the service. Nauna na rin siyang isinailalim sa preventive suspension para hindi maapektuhan ang imbestigasyon.

Kung mapatunayang may sala, maaari siyang makulong at tuluyang matanggal sa posisyon at madiskwalipika sa panunungkulan sa gobyerno. (Bhelle Gamboa)