49 na barko ng China namataan sa West PH Sea noong buwan ng Hunyo

Naitala ng Philippine Navy ang pinakamadaming bilang ng barko ng China sa teritoryo ng Pilipinas noong buwan ng Hunyo.

Sa press briefing sa Camp Aguinaldo sinabi ni Philippine Navy spokesperson for the West Philippine Sea Rear Adm. Roy Vincent Trinidad na mula June 1 hanggang June 30 ay may na-monitor na apatnapu’t siyam (49) na Chinese Coast Guard at People’s Liberation Army-Navy vessels sa Bajo de Masinloc, Ayungin Shoal at Pag-Asa Island.

Bagaman hindi namalagi ng isang buong buwan, sinabi ni Trinidad na nagpapabalik-balik ng nasabing mga barko sa karagatan ng Pilipinas.

Ayon kay Trinidad, ito na ang pinakamataas na bilang ng mga namataang barko ng China sa West Philippine Sea.

Noong Mayo ay nakapagtala ng apatnapu’t isang (41) Chinese Vessels sa West PH Sea, tatlumpu’t isa (31) noong Abril, tatlumpu’t lima (35) noong Marso, siyam (9) noong Pebrero at labing isa (11) noong Enero. (DDC)