Clustering ng kaso ng HFMD naitala sa isang paaralan sa Quezon City
Nagsagawa ng case investigation at active case finding ang mga opsiyal ng disease surveillance ng district 5 sa Quezon City kaugnay ng naitalang clustering ng kaso ng Hand, Foot, and Mouth Disease (HFMD) sa Rosa Susano Elementary School sa Barangay Gulod sa nasabing lungsod.
Nagsagawa rin ng specimen collection ang mga surveillance officer sa mga batang nakitaan ng sintomas ng HFMD sa Brgy. Sta Monica, Gulod at Novaliches Proper.
Matapos ang koordinasyon sa paaralan at pamunuan ng barangay Gulod ay nagsagawa naman ng disinfection sa mga silid-aralan, wash area, canteen, banyo at paligid nito.
Sa kasalukuyan, wala ng bagong kaso ng HFMD ang naiulat sa paaralan at karatig na lugar ngunit patuloy pa ring pinaaalalahanan ang mga guro at magulang na gawin ang mga angkop na pag-iingat upang maiwasan ang sakit.
Kabilang sa pag-iingat na maaaring gawin ay ang pagiging malinis sa paligid, regular na paghuhugas ng mga kamay, at pagsunod sa cough etiquette. (DDC)
