4 na pasahero naharang sa NAIA; dadalhin sana sa Pakistan para magtrabaho sa POGO

Apat na pasahero na tinangkang dalhin sa Pakistan para illegal na magtrabaho sa POGO ang naharang ng mga tauhan ng Bureau of Immigration (BI).

Ayon sa BI, ang isang lalaki at 3 babae na ang edad ay nasa pagitan ng 30 hanggang 40 anyos at patungo sana sa Hong Kong nang maharang sa NAIA Terminal 3.

Sa panayam sinabi ng apat na magbabakasyon lamang sila sa Hong Kong, gayunman sa secondary inspection, inamin din ng mga ito na sa Pakistan ang kanilang final destination at ni-recruit sila para magtrabaho bilang cleaners at cook sa isang online gaming compound doon.

Isang Chinese national umano ang nangako na susweldo sila ng P35,000 hanggang P40,000 at sinabihan silang magpanggap lamang na turista sa kanilang pag-alis sa bansa.

Hiniling na ni BI Commissioner Joel Anthony Viado sa Inter-Agency Council Against Trafficking na imbestigahan ang recruiters ng apat na biktima. (DDC)