2 lolo na iniulat na nawawala matapos mangisda, nailigtas ng PCG

Nailigtas ng Philippine Coast Guard (PCG) ang dalawang mangingisda na unang iniulat na nawawala matapos huling makita na naglalayag sa bahagi ng Pilar, Bataan noong Linggo, July 6.

Sa ikinasang search and rescue (SAR) operation ng Coast Guard Station (CGS) Bataan at BRP Boracay namataan ang dalawang mangingisda sa katubigan na sakop ng bayan ng Orion sa nasabi ring lalawigan.

Nakita ang dalawa umaga ng Lunes, July 7 habang nakalulan sa nakalubog nilang bangka at nag-aabang ng rescue makaraang makaranas ng malakas na hampas ng alon habang nangingisda.

Ayon sa Coast guard Bataan, ang dalawang mangingisda ay edad 70 at 71.

Dinala ang dalawa sa Port of Capinpin sa bayan ng Orion at agad isinailalim sa medical check-up sa Rural Health Unit (RHU). (DDC)