Lisensya ng mga driver ng taxi at TNVs na naniningil ng sobra sa NAIA, sinuspinde ng LTO

LISENSYA NG MGA DRIVER NG TAXI AT TNVS NA NANININGIL NG SOBRA SA NAIA, SINUSPINDE NG LTO

Pinatawan ng 90-araw na suspensyon ng Land Transportation Office ang lisensya ng sampung (10) driver ng taxi at TNVS na sobra-sobra kung maningil sa mga pasahero sa Ninoy Aquino International Airport (NAIA).

Ayon kay LTO Chief, Assistant Secretary Atty. Vigor D. Mendoza II nagpadala na din ng show cause orders (SCOs) ang LTO sa mga driver ng taxi at TNVS drivers na pawang nahuli sa isinagwang surprise operation sa NAIA.

Tiniyak din ni Mendoza na patuloy ang pagsasagawa nila ng operasyon sa NAIA para masigurong walang nananamantalang driver.

Regular na din ang paged-deploy ng team ng LTO enforcer sa tatlong terminal sa NAIA.

Kasunod ito ng nag-viral na mga insidente ng overcharging sa NAIA kung saan isang driver ang sinigil ng P1,300 ang kaniyang pasahero para sa biyahe mula lamang Terminal 2 patungong Terminal 3, at ang isa pang kaso ng paniningil ng P5,000 para sa biyahe mula Terminal 1 patungong Terminal 2. (DDC)