BI Warden Facility sa BuCor magagamit na ng mga dayuhang naghihintay ng deportation

Pinangunahan ni Justice Secretary Crispin Remulla ang inagurasyon at turn-over ng Bureau of Immigration Warden Facility (BIWF) sa Bureau of Corrections (BuCor) Compound sa Muntinlupa City na magsisilbing pansamantalang pasilidad para sa foreign nationals na sumasailalim sa proseso ng deportasyon.

Ang nasabing pasilidad ay mayroong sukat na 1,260 kuwadradong metro na matatagpuan sa Muntinlupa Juvenile Training Center (MJTC) Barracks sa loob ng NBP Reservation.

Ayon kay Catapang ang Bucor ay naglaan ng isang ektaryang lupa na gagamitin ng BI.

Unang ipinagkaloob ni Catapang ang kahilingan ni Immigration Commissioner Joel Anthony Viado na tuluy-tuloy na karapatan na mag-okupa ng nasabing pasilidad para sa pagkupkop ng mga dayuhang detainees na sumasalang sa deportation proceedings ng BI o naghihintay ng kanilang deportasyon.

Sa ganitong kolaborasyon, inihayag ni Catapang na hindi lamang nito mareresolba ang agarang pangangailangan para sa holding spaces kundi matitiyak din ang mga karapatan at kapakanan ng detainees na kanilang hawak sa panahon ng mga legal na proseso.

Ayon pa sa BuCor chief pinapakita rin nito ang pangako ng gobyerno na pabilisin ang proseso ng deportasyon habang sinisiguro ang makataong pagtrato sa mga sangkot na indibiduwal.

Isa sa mga importanteng aspeto ng nasabing kolaborasyon ayon kay Catapang ay ang itinatag na procedure sa paghawak ng foreign Persons Deprived of Liberty (PDLs). Sa halip na dalhin ang mga ganitong indibiduwal sa BI’s main office, direktang ililipat ito ng BuCor sa MJTC Barracks.

Patunay ito ng maagap na hakbang ng Bucor at BI sa pagpapaganda ng operational framework para sa deportation procedures sa Pilipinas.Sa pangakong magbigay ng ng dedikadong pasilidad at lalong episiyente, ang parehong ahensiya ay handang humawak ng lumalaking bilang ng foreign nationals na sumasailalim sa deportation proceedings ng mas epektibo.

Binigyang-diin pa ni Catapang na sa kanilang pagtutulungan sa ilalim ng Department of Justice, ang pinagsamang mga hakbang ng BuCor at BI ay hindi lamang magpapabilis sa legal na proseso kundi maitataguyod din ang mga karapatan ng mga apektado.

Para sa mga dayuhang naghihintay naman ng deportasyon, ang ganitong inisyatibo ay maghahatid ng diwa ng pag-asa,at maalagaan ang kapaligiran na nagpapaprayoridad ng bilis at respeto sa hamon ng sitwasyon. (Bhelle Gamboa)