DepEd naglalatag na ng mga hakbang para maiwasan ang ‘learning loss’ bunsod ng class suspensions

Tiniyak ng Department of Education (DepEd) na tinutugunan ng kagawaran ang epekto sa edukasyon ng mga class suspension bunsod ng kalamidad.

Ayon kay DepEd Secretary Sonny Angara, pangunahing prayoridad ang kaligtasan ng mga mag-aaral subalit dapat ding matiyak ang pagkakaroon ng learning continuity.

Sinabi ni Angara na simula sa Agosto 2025, sa mga lugar na madalas tamaan ng kalamidad ay maglalagay ng durable at mobile modular classrooms para magamit ng mga guro kapag kailangang magkaroon ng online classes.

Plano din ng DepEd ang gumamit ng AI-powered system na makakatukoy ng geohazard risks upang mas maagang makapaghanda ang mga paaralan kapag may kalamidad.

Kasabay nito ay pinaalalahanan ni Angara ang mga school officials at local governments na maging maingat sa pagdedeklara ng class suspension upang maiwasan ang learning gaps. (DDC)