Kaso ng dengue sa QC nadagdagan ng 85; bilang ng nasawi umabot na sa 17

Umabot na sa 5,484 ang naitatalang kaso ng dengue sa Quezon City ngayong taon.

Ayon sa Quezon City Epidemiology and Surveillance Division, ang nasabing bilang ng kaso ng dengue ay mula Jan. 1 hanggang Jul. 1, 2025.

Mas mataas ito ng 247 percent kumpara sa kaparehong petsa noong nakaraang taon.

Sa nakalipas na pitong araw ay 85 kaso ng dengue ang nadagdag, habang umakyat na sa labingpito ang nasawi sa sakit.

Patuloy ang paalala ng QC LGU sa mga residente na panatilihing malinis ang kapaligiran, protektahan ang sarili sa kagat ng lamok, palakasin ang resistensya ng katawan at agad magpakonsulta kung may sintomas ng dengue tulad ng lagnat, pananakit ng ulo, at rashes. (DDC)