Gov. Sol Aragones nanumpa na bilang Punong Lalawigan ng Laguna
Nanumpa sa tungkulin si Governor Marisol ” Sol ” Castillo Aragones- Sampelo bilang Punong Lalawigan ng Laguna sa ginanap na seremonya sa Cultural Center ng Kapitolyo sa Sta. Cruz, Laguna ngayong hapon.
Pinangasiwaan ni Quezon Province Governor Dr. Helen Tan ang pagpapanumpa sa tungkulin ni Gov. Aragones na sinaksihan ng kanyang Bise-Gobernador Atty. JM Carait, mga nanalong alkalde, bise-alkalde, at konsehal mula sa 24 na munisipalidad at anim na lungsod ng probinsiya.
Bago rito, masayang sinalubong ang gobernadora ng kanyang kasalukuyang Administrator na si dating Mayor Jerry Pelayo at mga ilang opisyal ng Kapitolyo.
Sa kanyang mensahe sinabi ni Gov Aragones na ang naging dahilan ng kanyang pagtakbo noong 2022 bilang gobernadora ay ang kanyang naging karanasan sa panahong may sakit ang ama at doon niya naramdaman na kawawa ang mga mahihirap na kababayang walang kakayanang magpagamot kaya personal niyang tututukan ang kalusugan sa Laguna.
Patunay ito sa nilagdaan niyang Executive Order No 1. na “Bawal ang Mataray” sa mga ospital, rural health, at barangay health centers na nagbabawal na magtaray ang mga kawani ng lalawigan.
Tiniyak nito na kailangang kumpleto ang kagamitan at gamot sa siyam na District hospitals ng lalawigan, karagdagang mga doctor, nurse, at health workers gayundin sa kanilang mga benepisyong matatanggap.
Inilunsad ng gobernadora ang Gobyernong may Solusyon at sinimulan nang mag-ikot ang apat na Akay ni Sol Mobile Botika upang mamahagi ng libreng maintenance sa diabetes, highblod, cholesterol, at maghatid ng iba pang medikal na serbisyo.
Isinagawa ang pamamahagi ng libreng gamot at medical mission sa Barangay Canlalay Binan City, Brgy. 6A San Pablo City, Brgy. Bubukal Sta Cruz at Brgy. Real Calamba City na pinondohan ng Akay ni Sol Party List.
Inilatag na rin ng gobernadora ang mga nakahandang programa at proyekto sa darating na Setyembre matapos garantiyahan na ang buwis ng tao ay dapat na pakinabangan ng kanyang mga kababayan sa pamamagitan ng pagkumpleto sa Akay ni Sol Mobile Botika sa lahat ng lungsod at bayan ng Laguna.
Itutuloy din ni Aragones ang nasimulan ng nakaraang gobernador na scholarship sa mga kabataan na kaniya itong dadagdagan.
Panawagan naman ng gobernadora sa mga kawani ng lokal na pamahalaan na maging loyal, matulungin at may pusong pagseserbisyo sa mga kababayan ng Laguna.
Siniguro rin ni Gov. Aragones na dapat na mapunta sa health, education at social services ang mga buwis ng mamamayan.
Nagpasalamat naman si Governor Aragones kay Administrator Pelayo na hindi siya iniwan at nagbigay ng pag asa sa kanyang pagtakbo sa ikalawang pagkakataon bilang gobernadora ng lalawigan at taos puso rin niyang pinasalamatan ang 600,000 na kababayang sumuporta at nagtiwala sa kanya nitong nakaraang halalan.
Palalakasin din nito ang turismo, tutulungan ang maliliit na negosyante at vendors upang tumulong sa pagpapaunlad ng probinsiya.
Magtatayo ng arko sa 24 na bayan at sa tabi ng arko ilang marker, pilgrimage tourism spots nito partikuar dito dahil may magagandang simbahan ang probinsiya.
Aniya kapag mayabong ang turismo marami ang trabaho at lalago ang Laguna.
Asahan na rin ang paglulunsad ng GOB SOL APP na hatid ng Akay ni Gob na libreng madadownload ng PWDs at senior citizens.
Inihayag din nito na ang e-konsultasyon, e- reseta na agad makuha at dalhin sa mga malapit na botika upang makatanggap ng gamot o ipapadala sa mga bahay ng pasyente.
Nanawagan din ang gobernadora ng pagkakaisa at pagtutulungan upang serbisyuhan ang mga nangangailangang mamamayan. (Bhelle Gamboa)
