Pekeng pulis arestado sa ilegal na droga, baril, at paggamit ng tsapa
Sa kulungan ang kinabagsakan ng isang lalaking nagpanggap na pulis matapos dakpin ng mga tauhan ng Substation 10 ng Taguig City Police Station (TCPS) sa kasagsagan ng mobile patrol operation sa C5 Service Road Northbound, Barangay East Rembo sa lungsod.
Kinilala ang suspek na si alyas “Hans”, 32-anyos, at residente ng Pili Avenue, West Rembo, Taguig City. Siya ay dinakip sa mga kasong paglabag sa Comprehensive Dangerous Drugs Act of 2002, Comprehensive Firearms and Ammunition Regulation Act, at Usurpation of Authority.
Ayon sa report, nagpapatrulya sa lugar ang team sa pangunguna ni Cpt Sherwin V. Revilla sa ilalim ng liderato ni Taguig CPS OIC Col. Byron F. Allatog, nang mamataan ang tumatakbong babae at hiningan sila bg tulong makaraang pagbantaan umano siya bg isang lalaking nagpakilalang pulis na agad nirespondihan ng otoridad.
Nang lapitan ng mga pulis ang lalaking nakasuot ng itim na jacket na mayroong PNP logo at nang tanungin ay nabigo siyang magpakita ng valid PNP identification card dahilan ng agaran niyang pagkaaresto.
Narekober sa suspek ang item na jacket na may PNP logo, mobile phone, dalawang two-way radios, sling bag, .45 caliber pistol kasama ang isang magazine at apat na bala, tinatayang 2.0 na gramo ng umano’y shabu na nagkakahalaga ng P13,600.00.
Dadalhin ang droga sa SPD Forensic Unit upang suriin habang isasailalim sa ballistic testing ang naturang baril.
Inihahanda ng otoridad ang pagsasampa ng kaso laban sa suspek sa Taguig City Prosecutor’s Office.
Pinuri ni SPD Acting District Director BGen Randy Y. Arceo ang mabilis na aksyon ng operating team at nag-isyu ng malakas na babala sa mga indibiduwal na nagpapanggap na pulis.
“We will not allow anyone to misuse the image and uniform of the PNP for personal gain or criminal activities. This incident should serve as a stern reminder that the law will always catch up to those who deceive and endanger the public by falsely claiming authority. The SPD remains firm in its commitment to safeguard the community against impostors and criminals,” sabi ni BGen Arceo.
Ang tagumpay na ito ay pagpapakita ng patuloy na mga hakbang ng SPD bilang suporta sa mga direktiba ni Chief PNP General Nicolas D. Torre III na tumutuon sa mabilis at mapagtugon na serbisyo publiko, may pananagutan at propesyunalisasyon sa mga operasyon ng pulis. (Bhelle Gamboa)
