Serpent eagle na inatake ng uwak nailigtas sa Kidapawan City
Isang batang Serpent Eagle ang nailigtas sa Kidapawan City makaraang magtamo ito ng pinsala sa kaniyang mata nang atakihin ito ng isang uwak.
Bumagsak ang agila sa isang establisyimento sa Brgy. Mateo kaya agad humingi ng tulong ang mga residente sa pamunuan ng Mt. Apo Natural Park–Protected Area Management Office (MANP–PAMO).
Sa inisyal na pagsusuri, ang 1.2-kilogram na batang agila ay nakitang sugatan sa kaniyang kanang mata.
Agad itong dinala sa University of Southern Mindanao (USM) Wildlife Rescue Center para magamot at pansamantalang pangalagaan.
Paalala ng Provincial Environment and Natural Resources Office – Cotabato sa publiko, agad iulat sa mga otoridad kung may makikitang sugatan o distressed na wildlife para agad matugunan at maisailalim sa gamutan. (DDC)
