EO No.1 na nagbabawal ng mataray sa mga ospital sa Laguna, nilagdaan ni Gov. Aragones

Pinirmahan ni Laguna Governor Sol Aragones ang Executive Order No.1 na may titulong “Bawal ang Mataray” sa mga ospital ng lalawigan sa unang araw ng kanyang panunungkulan sa kapitolyo na matatagpuan sa Sta. Cruz ngayong Lunes.

Sinabi ni Gov. Aragones na dapat nakangiti at mabait ang mga kawani sa mga pampublikong ospital, rural health at barangay health centers sa lalawigan.

Ito ay polisiya ng gobernadora upang tiyakin ang maayos na mga serbisyong pangkalusugan at sa mga ospital sa mga nasasakupang lugar.

Bago ang paglagda sa EO, nakipagpulong muna si Gov. Aragones sa kanyang Vice Governor na si Atty. JM Carait at mga nanalong miyembro ng Sangguniang Panlalawigan upang sama sama silang humarap sa mga departament heads upang masimulan na ang kanilang mga adbokasiya para sa mas maunlad na lalawigan ng Laguna.

Nagkaisa ang kanilang suporta sa pagsusulong ng maayos at mas magandang pamamalakad sa Laguna upang serbisyuhan ng may puso ang mamamayan.

Tinitiyak pa ni Aragones na kanyang pakikinggan ang anumang suhestiyon at mungkahi ng hepe ng mga departamento para sa maayos at mapapakinabangan na proyekto sa kanilang lalawigan.

Pinakilala naman ni Aragones ang kanyang Chief for Communications na si Dolan Castro at ang kanyang Administrator nasi dating Mayor Jerry Pelayo.

Isa naman sa kanyang mga consultant sa kalusugan ay si dating DOH Usec. Dr. Eric Tayag kaya asahan na ang kasiguraduhan ng tamang direksiyon ng alagang pangkalusugan na matatanggap ng mga taga-Laguna. (Bhelle Gamboa)