Online travel agent platform na AirAsia Move pinatawan ng P6M na multa ng CAB

Pinatawan ng P6 million na multa ng Civil Aviation Board (CAB) ang online travel agent platform na AirAsia Move.

Kasunod ito ng natuklasan ng Department of Transportation (DOTr) na pagkakasangkot ng AirAsia Move sa pagbebenta ng overpriced tickets.

Sa pahayag, sinabi ng DOTr na malinaw na hindi kukunsintihin ng gobyerno ang anumang uri ng pang-aabuso sa mga pasahero.

Tiniyak din ng DOTr na patuloy na isusulong ang karapatan ng commuting public at papanagutin ang mga lalabag sa regulasyon kaugnay sa consumer protection.

Kamakailan, tinawag ng DOTr ang pansin ng AirAsia Move matapos ang reklamo ni Leyte Rep. Richard Gomez at Ormoc Mayor Lucy Torres-Gomez.

Ayon sa mag-asawa, bumili sila ng tiket ng PAL para sa flight mula Tacloban patungong Manila gamit ang AirAsia Move App.

Ang one-way ticket ay umabot sa P77,704 ang presyo, gayung nasa mahigit P49,000 lamang ang presyo sa PAL website. (DDC)