Mga empleyado ng gobyerno na masasangkot sa discrimination sa mga taong may HIV maaaring makasuhan ng administratibo – CSC

Maaari nang makasuhan ng administratibo ang mga mapatutunayang sangkot sa discrimination sa mga taong mayroong human immunodeficiency virus o HIV.

Pahayag ito ng Civil Service Commission (CSC) kasunod ng pagpapalabas ng Guidelines on the Investigation and Prosecution of Discrimination Cases against Persons Living with HIV (PLHIV).

Sa ilalim ng CSC Resolution No. 25000399, inilalatag ang proseso sa imbestigasyon at pagsasampa ng reklamong discriminatory acts and practices laban sa opisyal o empleyado ng gobyerno na na sangkot sa discrimination.

Kabilang dito ang pag-diskrimina sa isang taong tukoy na may HIV o kahit nasa suspected HIV status pa lamang.

Kasama sa ituturing na discriminatory practices ang sumusunod:

– restriction sa pagbiyahe at habitation
– restrictions sa pagkakaroon ng shelter o maayos na matutuluyan
– pagbabawal na makapwesto sa public office
– hindi pagpayag na mabigyan ng credit at insurance services
– denial ng burial services
– at acts of bullying

Ayon sa CSC, sinusuportahan ng nasabing ordinansa ang Republic Act (RA) No. 11166 o ang Philippine HIV and AIDS Policy Act at bahagi ng inisyatiba ng komisyon na isulong ang ligtas at malusog na working environment para sa mga empleyado ng gobyerno.

Ang mga reklamo ng discrimination laban sa mga mayroong HIV ay reresolbahin sa ilalim ng 2017 Rules on Administrative Cases in the Civil Service. (DDC)