Apat na DA officials ligtas na nailikas matapos maipit sa giyera ng Iran at Israel

Nagpaabot ng pasasalamat si Agriculture Secretary Francisco “Kiko” Tiu Laurel Jr. sa Philippine Embassy sa Israel at iba pang ahensiya ng gobyerno sa maayos na pag-uwi sa bansa ng apat na opisyal ng Department of Agriculture (DA) na na-stranded sa Israel matapos ang tensiyon sa pagitan ng Iran at Israel.

Ayon kay Tiu Laurel, ligtas na nakabalik sa bansa ang DA delegation sa pangunguna ni Assistant Secretary Benjamin Albarece na nagtungo sa Israel para sa isang misyon upang pag-aralan ang dairy industry ng Israel.

Kabilang din sa study mission sina DA-Philippine Carabao Center (PCC) Executive Director Liza Battad at mga opisyal ng National Dairy Authority na sina Rowena Bautista at Angelica Escanilla.

Ang study mission ay bahagi ng pinalawak na hakbang ng DA upang magsaliksik ng pinakamainam na mga nakasanayan sa dairy production, na layuning mapalakas ang dairy sector ng Pilipinas.

Noong June 14 pa dapat nakabalik sa Pilipinas ang apat na opisyal ng DA matapos ang isang linggong study mission, gayunman, nakansela ang kanilang flight dahil sa pagsasara ng regional airspace dahil sa kaguluhan.

Ang mga opisyal ay tumuloy pansamantala sa hotel sa Central Israel kung saan naranasan nila ang napakaraming missile at bomb alerts. (DDC)