25 tonelada ng smuggled na sibuyas galing China, nakumpiska ng BOC at DA sa Misamis Oriental

Nakumpiska ng Bureau of Plant Industry (BPI) ng Department of Agriculture sa tulong ng Bureau of Customs (BOC) sa Mindanao International Container Terminal sa Misamis Oriental ang 25 metriko tonelada ng smuggled na pulang sibuyas mula sa China.

Batay sa report na isinumite kay BPI Director Glenn Gerard Panganiban ni Arnold dela Cruz, officer-in-charge ng Region X Plant Quarantine Service, ang shipment ay naka-consigned sa Lantix Consumer Goods Trading, isang kumpanya na nakabase sa Binondo, Manila.

Ang kargamento ay idineklarang naglalaman ng iba’t ibang frozen na produkto tulad ng egg noodles, croissant dough, pizza dough, buns at spring rolls.

Hiniling ng BPI-Plant Quarantine Service sa Cagayan de Oro sa BOC na pigilan ang paglabas ng container para maisailalim sa dagdag na inspeksyon.

Sa isinagawang physical examination natuklasan na ang shipment ay naglalaman ng sariwang pulang sibuyas na nagkakahalaga ng P2 million.

Ayon kay Agriculture Secretary Francisco P. Tiu Laurel Jr. walang sanitary at phytosanitary import permits mula sa DA ang nasabing mga kargamento.

Tiniyak ng kalihim na isusulong ng gobyerno ang pagsasampa ng legal na aksiyon sa ilalim ng bagong batas na Anti-Agricultural Economic Sabotage Act, na nagpapataw ng mabigat na parusa sa agricultural smuggling, kabilang na ang malaking halaga ng multa at mahabang pagkakulong. (DDC)