Resource center ng DSWD sa Pasay City at Cebu ginagawa nang moderno para sa mas mabilis na produksyon ng Food Packs

Pinamamadali na ang modernisasyon sa Family Food Pack (FFP) production lines ng Department of Social Welfare and Development partikular sa National Resource Operations Center (NROC) sa Pasay City at Visayas Disaster Resource Center (VDRC) Cebu.

Ayon kay DSWD Secretary Rex Gatchalian, batay ito sa utos ni Pangulong Ferdinand R. Marcos Jr. na mas pabilisin at paghusayin pa ang disaster response ng ahensya para sa agarang tulong sa mga pamilyang naaapektuhan ng kalamidad.

Sa ngayon ay gumagana na ang bagong mechanized packing system sa National Resource Operations Center (NROC) ng DSWD.

Dahil dito ay tumaas ang kapasidad nitong makagawa ng Food Packs mula 40,000 hanggang halos 70,000 kahon kada araw.

Ipinatutupad na rin ngayon ang bagong barcoding system para sa mas maayos na monitoring ng imbentaryo ng food packs.

Maliban dito sinabi ni Gatchalian na kaniya nang iniutos ang automated alerts para sa expiration ng mga suplay, na sabayang ipapadala sa Central Office at Field Offices. (DDC)