Power bank na nasa loob ng bagahe ng isang pasahero, nagliyab sa Roxas Airport
Nasunog at sumabog ang isang power bank na nasa loob bagahe ng isang pasahero sa Roxas Airport.
Ayon sa Civil Aviation Authority of the Philippines (CAAP), wala namang nasugatan sa insidente na naganap umaga ng Martes, June 24sa bahagi ng Initial Security Screening Checkpoint (ISSCP) ng paliparan.
Na-detect ng mga tauhan ng Paliparan ang 72,000 mAh power bank sa loob ng bagahe ng babaeng pasahero na patungong Manila.
Lagpas ito sa pinapayagang 160 watt-hour allowable capacity para sa power banks na maaaring isakay sa eroplano.
Ayon sa pasahero, pinayagan siyang maibiyahe ang power bank sa kaniyang flight mula Manila patungong Roxas City.
Kalaunan pumayag na din ang pasahero na iwanan ang power bank sa kaniyang kasama na nasal abas ng terminal.
Pero bago ito, bigla na lang nagliyab ang power bank habang nasa inspection table.
Agad namang naapula ang apoy gamit ang fire extinguisher, pero nasundan pa ito ng pagsabog ng power bank.
Nanawagan ang CAAP, sa mga pasahero na mahigpit na sundin ang aviation safety regulations, partikular ang mga may kaugnayan sa lithium-ion powered devices gaya ng power banks. (DDC)
