P5.1M na halaga ng party drugs nakumpiska sa isang kargamento na galing ng Paris, France

Nakumpiska ng mga tauhan ng Bureau of Customs (BOC) sa Port of Clark ang mahigit 3,000 piraso ng Ecstasy tablets o kilala sa tawag na “party drugs” na itinago sa isang kargamento na idineklarang naglalaman ng “Animal Food.”

Ayon sa BOC, nagkakahalaga ang nasabing mga kontrabando P5,126,350 na galing sa Paris, France at nakatakda sanang dalhin sa Taguig City.

Nauna nang nakatanggap ng derogatory information ang BOC mula sa PDEA hinggil sa nasabing shipment na dumating sa Port of Clark noong June 4, 2025.

Matapos ang ginawang K-9 sniff test isinailalim sa full physical inspection ang kargamento at doon nakita ang mga Ecstasy tablets na itnango sa apat na transparent pouches kasama ang dog food pellets.

Agad nagpalabas ng Warrant of Seizure and Detention sa kargamento dahil sa paglabag sa Customs Modernization and Tariff Act (CMTA), in relation to R.A. No. 9165. (DDC)